వంట బాగా చేయాలని భార్యను కోరడం తప్పేమీ కాదు: బాంబే హైకోర్టు కీలక రూలింగ్

తన భార్యను రుచిగా వంట చేయాలని, ఇంటి పనులు చేసుకోవాలని కోరడం తప్పేమీ కాదని, అది ఆమెను హింసించినట్టుగా భావించేందుకు సరైన కారణం కాదని బాంబే హైకోర్టు కీలక రూలింగ్ ఇచ్చింది. 17 సంవత్సరాల నాటి ఓ మహిళ ఆత్మహత్య కేసులో భర్త విజయ్ షిండే, ఆయన తల్లిదండ్రులకు కింది కోర్టు విధించిన శిక్షను నిలిపివేస్తూ, ఈ వ్యాఖ్యలు చేసింది. అప్పట్లో తనను హింసిస్తున్నారని, భర్తకు వివాహేతర బంధం ఉందని ఆరోపిస్తూ, ఓ మహిళ విషం తాగి ఆత్మహత్య చేసుకోగా, కేసు విచారణ హైకోర్టుకు చేరింది.

 "వంట సరిగ్గా చేయమని కోరడం, సక్రమంగా ఇంటి పని చేసుకోవాలని చెప్పడం వంటివి తప్పు కాదు. అదేమీ వేధింపులుగా భావించలేము. ఈ కేసులో అంతకు మించిన సాక్ష్యాలు నిందితులపై లేవు. ఐపీసీలోని సూసైడ్ సెక్షన్ల ప్రకారం కూడా వీరిని దోషులుగా పేర్కొనలేము" అని వ్యాఖ్యానించిన జస్టిస్ సరంగ్ కొత్వాల్, నిందితుడిపై వచ్చిన వివాహేతర బంధంపైనా ఆధారాలను ప్రాసిక్యూషన్ చూపించలేదని అభిప్రాయపడ్డారు.